Savée pouquo s' qu'on dit l'bos du r'nard? Ce tout' in histoir'. Ce l'temps qu'on l'racontich pasqu'im' pareu que les gé's d'Lorett' cachen't à l'mett' au jeu pou leu ducass'

N'cacheu gnieu ailleu, Coupi ce l'nom d'l'arnard du bos en quechtion. Dée l'temps les grands pé's d'Lorett' racontinn'te co l'histoir'. Apreu ell' s'a pierdu. Jé sé co asseu pou r'mett' les affair's à l'pach'.

Il a bieu longmée, du temps qu'il avoit in seigneur à Ath, nos vill' étoit tout' rétourné' d'bos.

Ee ravisant de l'guéritt', tout é hiaut de l'tour Burbant, c'étoit tout vert; que ça fuch' du coteu d'Meyau, d'Flobecq, eul Chonwée, Bouvnie ou Meslin.

Justemée, de s'coteu là, il avoit in grand bos usque l'seigneur d'Ath venoit à l'chass' quasimée tout' les s'maines. Meu jamée, i n'avoit soü attrapeu l'pum'ti pirot... Ca n'ètoit gnieu clair!...

Chau qu'inn n'savoit gnieu, l'Monseigneur, ceu l'triolaine qui avoit éteu montée pau m'tit croleu, un gamin du fourbou.

Tout jonn' l'éfant avoit trouveu dée l'bos énn petit' biett' pierdue d'su enn' brell'. Ell' trannisoit... elle avoit peur... égèlée, tout crue ell' ravisoit l'gamin pésant s'dernièr' heu' arrivée.

Meu... que du contrair', eul petit fieu l'avoit ramasseu tout douchmé'. Il avoit arssweu ses grand' è zoreill's, s'bell' queuil que vos arie dit in plumat... Tout s'petit corps deujà récauffeu. Surtout que l'gamin l'avoit mis dée spaltot. S'tiett' dépassoit... On vèyoit ses m'tits yeus canaill', euss' fin musiau qui lèyoit passeu in m'tit morciau de s'langu' tout' rôs'. Vos l'aveu r'couneu, c'ètoit in jonn' d'ernard... è su l'minut' c'ètoit pou les deux amiss à la vie à la mort! I dalinn'te joueu dée én gahiutt' bieu muchée dée in coin du bos ussque personn' n'venoit jamée.

L'croleu avoit baptiseu s'petit camarade "Coupi" comm' on disoit dée le fâp de la Fontaine qu'on aperdoit a l'écol'. Pasque l'croleu alloit à l'écol' de l'armitag'. C'ètoit èn grand école ussque les armit' s'avinn't instaleu, sul montée du bos, bieu avant l'existence de l'vill' d'Ath. Et Coupi suivoit l'gamin dée l'cour de l'écol'. Tous les éfants caressinn'te l'bell' fourur' de l'bonn' petit' biett' qui n'fèsoit jamée d'mau à personn'. Si Coupi s'embêtoit, il alloit dée les céss. Il ètoit ratèdu partout. C'ètoit én jatt' de lait par chi, in bon morciau d'froumag' par là. Dée les poullieu y donnoit in cop d'main à les pouillett' pou raminneu les poussins pierdus. Y les poussoit aveu s'fin musiau sans jamais les mord'. Quée bonn' petit' biett' que c'étoit ça...!

L'croleu l'avoit dresseu étout pou dounneu l'alert' au bos quand eul marquis venoit de l'vill' aveu ses gvaux è ses tieus. C'ètoit les jou d'la chass'. Alors Coupi courroit sot pa tout l'bos. Et tout d'in cop c'ètoit l'silence compleu. Biett' à pleum' é à poil ètinn'te muchées... On n'étèdoit foc pu l'vée qui souffloit dée les feuill' des arp's.

De temps à aut' on véyoit Coupi qui passoit à tout' vitess' dèfiant les tieus du marquis. Meu comm' y counichoit les ageu... impossip de l'rattrappeu.

Pourtant in jou ça a éteu tout juss. Coupi n'avoit foc o-u l'concour de s'jèteu dèe l'capell' de l'armitrag'. C'ètoit l'salut è l'croleu, éfant d'choeur servoit l'cureu. On a habie sèrreu l'port' è l'biett' s'a mis du stoc sul banc éter deux armit qui disinn'te leu prièr'. On li a mis in frac sus dos qu'y n'avoit foc ses oreill' è s'fin musiau qui dépassinn'te l'capuchon. Sus c'temps là, les gée du marquis éfoncinn'te l'port'... meu y n'ont gnieu trouveu Coupi.

On n'a fée l'jeu deux trois cop, meu pou fini, comme on s'doutoit d'èn saqueu, il a in grand laugnard qui s'a éffuteu padièr' én postur' de Saint Antoine pou surveilleu l'affair'. Comm' de fufait, Coupi a r'venu aveu les chasseurs à s'poursuit'. Stoquant su ses patt' de dièrr' on li a r'mi s'frac d'armit é il eu resteu sans boujeu.

Tèdant s'arc l'tireu l'avoit a bel pou l'ajusteu. L'flêch a chuffleu avant d'traverseu d'in cop l'corps de l'petit' biett', avant d's'estiqueu dée l'pieu de l'kayèr' prèchoir. Coupi étoit mort sul cop. Vos arie dit qu'i dormoit.

Alors on a vu l'croleu ramasseu tout douchmée s'petit camarad' é y sont dalleu à deux tout droit sul kemin, cont' eul soleil qui s'couchoit tout rouch éter les arp'. A m'sur qu'ils avanchinn'te leu n'ombrag' grandissoit... grandissoit...! Les armit abluis n'ont gnieu so-u vir pas ussqu'ils avinn'te tourneu.

On dit que bieu pu tard on a r'trouveu les deux amiss dée l'gahiut' de leu jonn' temps. Coupi dée les bras du croleu... tiett' cont tiett'... L'croleu ètoit dalleu là pou morri d'chagrin.

Pou l'souvnance de c'bell' histoir' là on dit qu'les gées d'Lorett' vont fée r'veni Coupi aveu s'frac d'armit téll' qu'il ètoit quant il avoit l'seigneur d'Ath à ses trousses.

Eul seigneur on n'é pal pu... Meu Coupi sortira à tout' les ducass' pou rappèleu à les éfants, é mêm' à les grand' gée, l'bonteu des biett', é qu'inn faut jamée leu fé du mau.